ጸሎተ ኪዳን Tselote Kidan/ Prayer of the Covenant

ክፍል ፩ ፥ የነግህ ኪዳን

1.    ለከ እግዚኦ፦

ለከ እግዚኦ ለገባሬ  ኵሉ ፥ ለዘኢታስተርኢ  አምላክ ፥ ንሰፍህ ነፍሰነ ፥ ወስብሐተ  ዘነግህ ፥ ንፌኑ  ለከ  እግዚኦ  ፥ ለጥበበ ኵሉ ኃያል  ፣ ብዙኀ ሣሕል አምላክ ሣራሬሃ  ለነፍስ፤ ንሴብሐከ ለዘእምቅድመ  ዓለም ፥ ተወልደ  እምአብ ቃል ፥ ዘባሕቲቱ ፤ በቅዱሳኒሁ፤  ዕሩፍ ኪያከ  ዘትሴባሕ እምስብሐታት  ዘኢያረምም፤ ወእምሠራዊተ  ሊቃነ መላእክት፤ ኪያከ  ዘኢተገብረ  በእድ ፣ ፈጣሬ  ኅቡአት ዘኢያሰተርኢ፣  ንጹሕ ወቅዱስ ዜናዊ  ዘነገረነ ፥ ጥበበ  ኅቡአተ  ቅድሳቲከ ፥ ወብርሃነ  ለነ  ዘኢይጠፍእ አሰፈውከነ፤ ስብሐተ ወአኵቴተ ንፌኑ ፥ ወቅድሳተ ንጹሐ፤ ንብል ንሕነ እሊአከ አግብርት ፥ ወሕዝብኒ  ኪያከ  ይሴብሑ።

        ይ. ሕ. ኪያከ ንሴብሕ  እግዚኦ፤

2.    አምላከ ብርሃን ፦

አምላከ ብርሃን ወላዴ ሕይወት ርእሱ  ለአእምሮ  ፥ ወሀ ቤ  ጸጋ  ዘእምጸጋ ፍጹም ፥ ገባሬ  ነፍስ ፥ በቋዒ  ዘጋዌ  መንፈስ ቅዱስ፤  መዝገበ  ጥበብ ረዳኢ ፣ መምህረ  ቅዱሳን ፣ ወመሠረተ ዓለም፤ ዘይትዌከፍ ጸሎተ  ንጹሐን፣ ለከ ንሰብሕ ወልድ ዋሕድ፣  ቀዳሜ  በኵር፤ ቃለ  አብ ዘለኵሉ  ዚአከ  ጸጋ  ዘወሀብከነ ፥  ለእለ  ንፄውዓከ፤ አብ ንጹሕ ፣ ዘአልቦ  ነውር፣ ዘቦቱ  ጥሪት ኀበ  ፃፄ ወቍንቍኔ ኢያማስኖ፤ ለዘበኵሉ ኅሊና ለእለ ይትዌከሉ  ብከ  ትሁብ፤ ዘያፈትዎሙ  ለመላእክት የሐውፅዎ፣ ለዘእምቅድመ  ዓለም  ብርሃን አቃቢነ  ዘኢይማስን  መዝገበ  ጽልመት እንተ  ብነ ፥ በሥምረተ  አቡከ  እብራህከ  ለነ፤ ዘአውጻእከነ እማዕምቅ ውስተ ብርሃነ፣ ወወሀብከነ  ሕይወተ  እሞት ፣ ወጸጎከነ  እምግብርናት  ግዕዛነ፤ ዘበመስቀልከ  አቅረብከነ  ፥ ኀበ  አቡከ  መልዕልተ  ሰማያት፣ በወንጌል መራሕከነ ፣ ወበነቢያት ናዘዝከነ  ፣ ዘለሊከ  አቅረብከነ ፣  አምላክ፤ አላ  ብርሃነ  ሀበነ   እግዚኦ ፥ ለከ  ለአምላክነ  ንወድስ ፥ ከመ   ወትር  በዘኢያረምም  አኮቴት፤ ንብል  ልሕነ  እሊአከ አግብርት ፥ ወሕዝብኒ  ኪያከ  ይዌድሱ፤ 

       ይ. ሕ. ኪያከ ንዌድስ  እግዚኦ

3.    ንሤልስ ለከ፦

ንሤልስ ለከ  ዘንተ  ስብሀተ  እምአፉነ ፥ ዘምስለ  መንግስትከ  ዘለዓለም፤ ኢየሱስ ወልደ  እግዚአብሔር ፥ ዘመልዕልተ  ኵሉ  ምስለ  አብ ፥ ኵሉ ፍጥረት ይሴብሐከ  በረዓድ ወበፍርሃተ  መንፈስ፤ ዘኵሉ  ነፍስ ይፈርሆ  ፥ ወኵሎሙ  ነፍሳተ  ጻድቃን ብከ  ይጼወኑ፥ ዘአዝኀንከ  እምኔነ  ማዕበላተ  ውኁዛተ  መናፍስት ዘኮንከነ፤ መርሶ  ሕይወት እሙስና  ወዘኮንከነ  ምጕያየ፤  ዘቦቱ  ተስፋ   መድኃኒት  ዘለዓለም፤  በባሕር እለ  ይትመነደብቡ  ታድኅን ፣ ወለእለ በበድው ፥ በጸጋ  ትፌውስ፣ ወለእለ  በመዋቅህት ጽኑዓን ፥ ዘምስሌሆሙ  ትሄሉ፤  ዘእማዕሠረ ሞት ፈትሐነ፤ ዘለምስኪናን ወለልሕዋን ይናዝዞሙ፤ ወለእለ  ፃመው በመስቀሉ  ይባልሕ፤ ዘኵሎ  መዓተ  ይመይጥ ወያሴስል እምኔነ ፣ ለእለ  ቦቱ  ተወከልነ። ዘነቢያት ወሐዋርያት አእኵቱከ  በኅቡዕ፣ ኪያከ ንዌድስ እግዚኦ  ወንሴብሐከ፤ ከመ  ለቢወነ ብከ  ናዕርፍ በማኅደረ  ሕይወት፤ እንዘ  ንገብር ፈቃደከ፤ ሀበነ  ንሑር በትዕዛዝከ ፤ ወኵሎ እግዚኦ  በምሕረትከ  ሐውጽ ንዑሳነ  ወዐቢያነ፣ መኵንነ ውሕዝቦ፣ ኖላዌ  ወመርኤቶ፤ እስመ  ዚአከ  መንግስት ቡሩክ ፥ እግዚኦ  አምላክነ፤ ስብሐት ለአብ ፣ ወወልድ ፣ ወመንፈስ ቅዱስ፣ እምቅድመ  ዓለም  ፥ ይእዜኒ  ወዘልፈኒ  ፤ ለዓለም ወለትውልደ  ትውልድ ፥ ዘኢየኀልቅ፤ ለዓለመ ዓለም።

         ይ. ሕ. አሜን።